ကယ်တင်နိုင်သောဘုရား

“ငါတို့၏ဘုရားသခင်သည် ကယ်တင်နိုင်သောဘုရားဖြစ်တော်မူ၏။ ဘုရားရှင်ထာဝရဘုရားသည် သေခြင်းသို့ရောက်သောလမ်းကိုလည်း အစိုးပိုင်တော်မူ၏” (ဆာ ၆၈:၂၀)။

လောကတွင် ဘုရားဟု ခေါ်ဆိုခံရသော အရာများစွာရှိသော်လည်း၊ စစ်မှန်သောဘုရားသည် အသက်ရှင်တော်မူသော ထာဝရဘုရားတစ်ပါးတည်းသာဖြစ်သည်။ ကိုးကွယ်ထိုက်သောဘုရားသည် ကယ်တင်နိုင်စွမ်းရှိသူဖြစ်ရမည်။ တရားသာပြပြီး ကယ်တင်နိုင်ခြင်းမရှိလျှင် အသက်ရှင်သောဘုရားမဟုတ်ပါ။ ကျွန်ုပ်တို့ကိုးကွယ်သော ထာဝရဘုရားသည် “ကောင်းကင်နှင့်မြေကြီးကို နှုတ်တော်အားဖြင့် ဖန်ဆင်းတော်မူ၍” (ဆာ ၃၃:၆)၊ လူသားများကို လက်တော်အားဖြင့် ဖန်ဆင်းပြီး လူတို့၏ အသက်ရှူသံကိုပင် ပိုင်ဆိုင်ထိန်းသိမ်းတော်မူသောသူဖြစ်သည် (ဟေရှာယ ၄၂:၅)။

ဝိညာဉ်ကို ကယ်တင်သောဘုရား
ထာဝရဘုရားသည် ကျွန်ုပ်တို့ကို အရာအားလုံးမှ ကယ်တင်နိုင်တော်မူသည်။ လူသားတို့သည် နေ့စဉ်အပြစ်ဒုစရိုက်များနှင့် မကင်းလွတ်နိုင်ပါ။ အပြစ်၏အခကြောင့် သေခြင်းကိုရင်ဆိုင်ရမည်။ ထို့ကြောင့် တမလွန်ဘဝအတွက် စိုးရိမ်ပူပန်မှုများနှင့် ပြည့်နှက်နေကြသည်။ သို့သော် ဘုရားသခင်သည် သားတော်ယေရှုခရစ်အားဖြင့် ကယ်တင်ခြင်းလမ်းကို ဖွင့်ပေးတော်မူသည်။ “ထာ​ဝ​ရ​အ​သက်​ကို ရ​စေ​ခြင်း​ငှာ၊ ဘု​ရား​သ​ခင်​သည် မိ​မိ၌ တစ်​ပါး​တည်း​သော သား​တော်​ကို စွန့်​တော်​မူ​သည်​တိုင်​အောင် လော​ကီ​သား​တို့​ကို ချစ်​တော်​မူ၏။-” (ယောဟန် ၃:၃၆)။ ယုံကြည်ခြင်းဖြင့် သားတော်ကို လက်ခံသူများသည် ငရဲမှ လွတ်မြောက်ပြီး ကယ်တင်ခြင်းကို ရရှိကြမည်ဖြစ်သည်။ လူသားချင်း မကယ်တင်နိုင်သော်လည်း၊ ဘုရားသခင်သည် အပြစ်နှင့် ငရဲမှ ကယ်တင်နိုင်တော်မူသည်။

ခန္ဓာကိုယ်နှင့် လိုအပ်ချက်များကို ကယ်တင်သောဘုရား
ဘုရားသခင်သည် ဝိညာဉ်ကိုသာမက ကျွန်ုပ်တို့၏ ခန္ဓာကိုယ်နှင့် နေ့စဉ်ဘဝလိုအပ်ချက်များကိုလည်း ဖြည့်ဆည်းပေးနိုင်သည်။ ဒုက္ခဆင်းရဲထဲတွင် ကယ်တင်ပြီး လမ်းမရှိသောနေရာတွင် လမ်းခင်းပေးတော်မူသည်။

“သူ​တို့​သည် တော​လမ်း​ဖြင့်​ဆောင်​သွား​တော်​မူ​ခြင်း​ကို ခံ​သော​အ​ခါ ရေ​မ​ငတ်​ကြ။ သူ​တို့​အ​ဖို့ ကျောက်​ထဲ​က​ရေ​ကို စီး​စေ​တော်​မူ၏။ ကျောက်​ခဲ​ကို​ပင် ခွဲ​တော်​မူ​သ​ဖြင့်၊ ရေ​သည် စီး​ထွက်​လေ၏။ ” (ဟေရှာယ ၄၈:၂၁)။

ရန်သူဝိုင်းနေချိန်၊ ပင်လယ်ပိတ်ဆို့ထားချိန်တွင်ပင် လမ်းဖွင့်ပေးခဲ့သည် (ထွက်မြောက်ရာ ၁၄:၂၁-၂၂)။ စားစရာမရှိသည့်အခါ မန္နမုန့်နှင့် ငုံးသားများကို ပေးပို့ခဲ့သည် (ထွက်မြောက်ရာ ၁၆:၄, ၁၃)။

၁၂ နှစ်ကြာ သွေးသွန်ရောဂါခံစားနေရသော အမျိုးသမီးကို ကျန်းမာစေခဲ့သည် (မာကု ၅:၂၅-၃၄)။ သေဆုံးသွားသော လာဇရုကို ထမြောက်စေခဲ့သည် (ယောဟန် ၁၁:၄၃-၄၄)။ ခြေမစွမ်း၊ မျက်စိကန်းသူများကို ပျောက်ကင်းစေခဲ့သည် (မဿဲ ၁၅:၃၀-၃၁)။ ကာနမြို့မင်္ဂလာပွဲတွင် အဆင်မပြေမှုကို ဖြေရှင်းပေးခဲ့သည် (ယောဟန် ၂:၁-၁၁)။ ဤသက်သေများသည် ဘုရားသခင်၏ ကယ်တင်နိုင်စွမ်းကို ထင်ရှားစေသည်။

အစဉ်မပြောင်းလဲသောဘုရား
မည်သည့်ဒုက္ခပြဿနာကြုံတွေ့နေရပါစေ၊ ဘုရားသခင်သည် ကျွန်ုပ်တို့ကို ဘယ်သောအခါမှ စွန့်ပစ်မထားပါ။ “သင်​တို့​ကို စွန့်​တော်​မ​မူ၊ ပစ်​ထား​တော်​မ​မူ​ဟု ဟော​ပြော၏။ ” (တရား၊ ၃၁:၆)။ ဒုက္ခထဲမှ အော်ဟစ်ခေါ်သံကို အမြဲနားထောင်ပြီး ကယ်တင်ရန် လက်တော်ကို ဆန့်တန်းပေးသည်။ “ယေ​ရှု​ခ​ရစ်​သည် မ​နေ့၊ ယ​နေ့၊ နောင်​ကာ​လ အ​စဉ်​အ​မြဲ မ​ပြောင်း​မ​လဲ နေ​တော်​မူ၏။-” (ဟေဗြဲ ၁၃:၈)။ ယခုဘဝရော၊ နောင်ဘဝ အတွက်ရော ကယ်တင်နိုင်သောဘုရားသည် ကျွန်ုပ်တို့၏ ကိုးကွယ်ရာဘုရားဖြစ်ပါသည်။

ထိုအသက်ရှင်သော ဘုရားသခင်ကို ယုံကြည်သောသူတိုင်းသည် ယခုဘ၀၊ နောင်ဘ၀အတွက် အာမခံရရှိမည်ဖြစ်သည်။ ယနေ့ သင်လိုအပ်သမျှကိုလည်း ထောင်ပံ့ပေးမည့် ဘုရားရှင်တော်မြတ်ဖြစ်သည်။ သေနေသောဘုရားမဟုတ်၊ အစက်ရှင်သော ဘုရားဖြစ်သည်။ ထိုဘုရားရှင်နာမတော် ကမ္ဘာအဆက် ဆက်ဘုန်းကြီးတော်မူပါစေသတည်း။